ako pa rin sa iyo'y nagmamahal

Ilang ulit nang sa sarili’y sabihin

Munting ala-ala may naglaho na

Kahit isang larawa’y limot na

Ng isipa’t pusong sa iyo’y nabilanggo

Ilang ulit na ring sabihin sa sariling

Ika’y hindi alang sa akin

Na sa pagdating ng sandaling takda’y

Darating ang sa aki’y laan

Subalit ang hangi’y walang awa

Ibinabalik bawat saglit ang mga gunita

Ng mga kahapong pinagsaluhan,

Mga oras ng pagpupulo’t gata

Sa kabila ng katotohanang

Ako lamang ang may mga ala-ala

Ako lamang ang may kimkim

Sa mga gunita ng ating mga pagsasama

Mga gabi at madaling-araw

Mga tanghaling tapat at dapit-hapon

Mga oras at sandali na an gating mga katawan

Ay magkalapat, magkayakap.

Sa kabila ng katotohanang

Ako lamang ang nagmamahal

Ako lamang ang nagmamahal.

Ilang ulit nga ba kitang dapat mahalin?

Ilang libong pagkakataon bang

Dapat tayo’y magkasiping

Upang kahit piraso ng iyong pag-ibig

Ay mailaan sa akin?

Ilang gabi pa ng mga pagluha’t pag-asa

Ang ilalaan sa bawat isang pagsapit ng umaga

Ilang araw ang kailangang manariwa

Sa bawat paglubog ng araw sa kanluran?

Sa kabila ng katotohanang

Lahat ng ito’y limot mo na,

Lahat ng ito’y kahapon na lamang

Ng iyong kasalukuyan,

Ako pa rin ay nagmamahal

Ako pa rin sa iyo’y nagmamahal,

Magmamahal.